Eco, la paparucia. Inquò a
voi cuntarav dla paparucia, cle praticament intraduzibil in italian, e alora
tant val diral in frares.
Mie nona, tant an fa, la
miteva a cuosar i fasò, dop averi fat star tuta la not a murbidiras
intl’aqua. Con un poc ad chi fasò e con l’aqua ad cotura, un puchin d’oli e ad
sal, quand l’aveva tirà fora chialtar fasò par farag la pasta, o par magnari
acsì, la preparava la paparucia.
Quand l’aqua con i fasò la ricominciava
a buir, lag miteva poc ala volta la farina zala, quela ad furmanton, la
continuava a smirsiar e ala fin a risultava na specie ad pulenta tendra,
morbida, un poc più scura par i fasò, e più unta dla pulenta normal.
Apena cota ala miteva tuta in ti piat fond, quand ancora la iera
liquida.
Pian pian la dvantava dura,
com se la fus na specie ad budin, e a cal punt la paparucia la iera pronta da
magnar. Ades a la fag anca mi, più o
men al stes mod, e a mie fiol, a dev dir, lag pias purasà, e mi a son cuntent.
Sicurament an rispet brisa la tradizion, anghò brisa la stua a legna o a
carbon, ma amrang, e quand a la magn am par ad turnar un ragazet, com quand a
magn i didalin con i fasò un po’ brusà. Il suor dl’asilo indù andava da piculin
il brusava sempar cla mnestra, e a mi lam piaseva propria acsì, un poc brusada.
( La riproduzione è riservata. Ma non c'è nessun problema se si cita la fonte. Grazie)
Nessun commento:
Posta un commento
I commenti offensivi o spam saranno cancellati. Grazie della comprensione.