Bon'ann

A l’ho fat sol du ann, brisa ad più, quand ancora a staseva a Poròt. La prima volta am son fat cunvinzar dai miè, e alora al prim dl’ann, ala matina prest, quand il strad i'era ancora vodi e in zir an gha stava nisun, ho scuminzià a zirar pr'al paes e a sunar i campanin o a busar sul port dil cà  intoran. Mi ant'gnusceva brisa cla zent, e quand i varzeva la porta mi agh 'geva: “Bon'ann!”.

Qualcdun alm dava zinc franc, di altar nient, e im guardava scucià, e dop un poc ad sti zir, stuf, a turnava a cà, con poca roba in til bisach. Agh iera anch di altar ac zirava, e i faseva cme mì, ma an so brisa cusa i fus bun ad ciapar. Mie padar al 'geva che prima as rivava più sold as ciapava, ma a mi stal quel al nam cunvinzeva par nient.

Al sgond ann c’ho fat sta roba am son stufà prest, e la zent clam guardava mal la ma fat andar via la voja. Sagh pens ades l'am par tuta na stupidada. Par qual mutiv bisugnaria dar di soldi a un c’al vien a smirsiarat la manina prest dal prim dl’ann? E magari dop esar andà a let tardi.

A dev però dir un quel. Alora par un frares se a darat al bon’ann par prim al dì ad capdann la iera na dona la purtava sfurtuna, e alora tut i ragazit iandava in zir par essar i prim masc a far i'auguri. 
Tant quei jè cambia, ma con la superstizion an san scherza brisa. Anch adess i vecc ich cred incora.

                                                                            Silvano C.©


( La riproduzione è riservata. Ma non c'è nessun problema se si cita la fonte.  Grazie)